MOTAK

Beroketa motak sailkatzeko modu ezberdinak daude. Autore ezberdinek (Bishop, 2003a; Berdejo, 2011; Pérez et al., 2013) nagusiki bi beroketa mota bereizten dituzte, beroketa pasiboa eta beroketa aktiboa. Aldi berean, beroketa aktiboaren barruan beroketa orokorra eta kirolaren beroketa espezifikoa bereizten dituzte. Beste autore batzuek (Vaquera et al., 2002; Calleja et al., 2008) hirugarren sailkapen bat ezberdintzen dute taldeko beroketa eta beroketa indibiduala banatuz.

• PASIBO ETA AKTIBO

Beroketa pasiboa gorputzaren eta muskuluen tenperaturaren handitzean datza, kirolaria mugimendurik egiten ez duen jardueren bidez. Jarduera horien artean dutxa eta bainu beroak, saunak, diatermia, manta elektrikoak edo masajeak daude. Egia esan, kirolariek ez dute berotzeko metodo hau bakarrik erabiltzen, baizik eta beroketa aktiboaren osagarri moduan. Esku pilotaren kasuan, takoak ipintzeko erabiltzen den berogailua, “hornillo” askotan deitua, beroketa pasiboaren adibide izango litzateke.

Beroketa aktiboa berriz, gorputzaren eta muskuluen tenperatura handitzen du kirolariak egiten duen jarduera fisikoaren bidez. Gure proposamenean jarraituko dugun eredua da, izan ere, potentziak eragina duen kiroletan teknikarik egokiena baieztatu baita (Bishop, 2003).

Beroketa aktiboaren barruan errutina ezberdin asko planteatzen dira. Errutina batzuk luzapenak erabiltzen dituzte, beste batzuk ordea, mugimendu balistikoagoak. Seguruenik, errutina hauetan egindako luzapen mota, estatikoa edo dinamikoa,  eztabaida gehien sortu duen gaia izan da. Azken aldiko ikerketa ugari (Faigenbaum et al., 2005; McMillian et al., 2006; Chaouachi et al., 2009) luzapen estatikoak  beroketan baztertzeko tendentzia dute, dinamikoei garrantzi gehiago emanez. Tendentzia hau, luzapen dinamikoak indarra, potentzia eta bizkortasunean izandako emaitza hobeagoetan oinarritzen da.

 VS.

Proiektu honetan planteatzen den ereduan, luzapen dinamikoak soilik erabiliko dira beroketan, partidu edo entrenamendu ondorengo lasaitasunera bueltarako luzapen estatikoak utziz .

• OROKORRA ETA ESPEZIFIKOA

Beroketa guztiak atal orokorra alde batetik eta atal espezifikoa beste batetik osatuak egongo dira. Beroketa orokorra lan orokor bati egiten dio erreferentzia. Duen helburu nagusia, jarraian burutuko den jarduera kontuan hartuz organismoaren prestaketa hastea da. Proiektuan planteatutako ereduan atal orokorraren barruan aktibazio aerobikoa eta mobilizazio eta aktibazio muskularra daude.

Hasierako lan orokor hau, beroketa espezifiko baten jarraipena izango du. Bigarren atal espezifiko hau kirolaren edo burutuko den jarduerara eta honek dituen beharretara bideratua egongo da. Gure kasuan, esku pilotako partidu edo entrenamendu baterako bideratuak daude. Hori dela eta, atal espezifiko honetan kantxan esku pilotan aritzean normalean egiten diren mugimenduak imitatzea izan dugu helburu. Amaitzeko, eskuen beroketa eta jokoaren ekintza espezifikoak pilotarekin egitea gomendatzen dugu.

• TALDEKO BEROKETA ETA BEROKETA INDIBIDUALA

Talde beroketa, izena esaten duen moduan taldea osatzen duten kideak burutzen dutena da. Euskal pilotaren barruan taldeka jokatzen den  modalitateak badira ere, gehienetan binaka edo banaka jokatzen da. Hortaz, taldeko beroketari buruz ari garenean partidu edo entrenamendu horretan parte hartzen duten pilotariei buruz arituko gara. Beroketa honetan pilotari guztiek parte hartu dezakete aurretik ikusi ditugun beroketa aktiboa, orokorrak edo espezifikoak direnak burutuz.

Beroketa indibiduala ordea, jokalari bakoitzak bilatzen duen egokitzapen indibidualizatua da. Jokalari edo kasu honetan pilotari bakoitzak egiten duen lan pertsonala da, eta bakoitzak dituen gabezi, aurretik izandako lesio edo ohituren araberakoa izango da. Esku pilotaren kasuan pilotari batzuk nahiago izaten dute pilota “goxua”-rekin berotzen hasi, pilota gogorrarekin jarraitu aurretik. Edo lesio bat izandakoak badira, artikulazio edo muskulu horretarako beroketari denbora gehiago eskaintzen diote.